بأقلامهم >بأقلامهم
"كان الزمان"
الأحد 9 04 2023 09:33
القاضي م جمال الحلو
جنوبيات
رزق الله على أيّام زمان، أحلى وأطيب أيّام، رغم التّعب كان في متعة اكبر بالجيرة والعلاقات الأسريّة وأفراح الأعياد…
زمان الكولا كان اسمها كازوز..
والجينز كان اسمو كاوبوي..
زمان البطّيخ مليان بزر أسود..
زمان كانت المَيّ من الحنفيّة،
والخبز نوعين عربي وفرنجي..
زمان كانت الرّحلة نقعد أسبوع نحضّرلا..
زمان كان التّلفون إجت الحرارة ولّا بعد..
زمان كانوا الولاد يلعبو فطبول، لقّيطة، كرشك عالي كرشك واطي، عصفورة، وأبطال وحراميّة.. والبنات يلعبوا بيت بيوت، وإكس..
زمان كانت المسلسلات المفضّلة: عازف الليل، وصحّ النّوم، وأبو سليم الطبل، وأبو ملحم، وفيلم عربي أو أميركي طويل..
زمان كان التلفزيون ٧ و ١١، والأنتين لفّ يمين لفّ شمال شويّ شويّ..
زمان كان اللي بيرجع من السّفر لازم يجيب هدايا للكلّ، ولمّا يسافر الكلّ يروح ع المطار يودّعو، بحيث يكون عدد المودّعين أكثر من المسافرين..
زمان كان الباص كلّ شي بزمّر فيه إلّا الزمّور..
زمان صوت البيّاعين غناء وسجع..
زمان كانت الضّحكة حلوة والنّاس طيّبة وعلى البركة..
زمان كانت النّاس تستقرض رغيف الخبز، وشويّة ملح، وحامضة، وبصلة وراس توم..
زمان صحون الأكل سرفيس بين البيوت..
زمان كان القمر أحلى والسّما أحلى..
زمان كان أحلى من هالزمان..
الله يرحم إيّام زمان، ويرحم الستّ أمّ كلثوم لمّا كانت تغنّي: "لسّه فاكر، كان زمان"..
"وعاوزنا نرجع زيّ زمان، قول للزمان ارجع يا زمان"..
القاضي م جمال الحلو
