يا عمّي.. صار كيلو البنّ فوق ال900 ألف ليرة! يلّا، بلا القهوة، أصلًا مضرّة للأعصاب. ومن غير شي أعصابنا تلفانة. يا سلام.. إجت بوقتها! 

شو عم يقولوا كرتونة البيض صارت ب460 ألف ليرة! يلّا، بلا البيض المقلي والمسلوق بيعملوا كولسترول. إجت على إجريها! 

قال كيلو السكّر صار ب100 ألف ليرة! حصل خير، بلا ما يصير معنا سكّري. من زمان حابب خفّف السّكّر. إجت والله جابها! 

يا ويلي البنزين صار ت ال التّنكة حوالي المليون و600 الف ! يلا بروح مشي، وبجي مشي. الرّياضة كتير مفيدة للصحّة. 

سيدي، بلا الوقفة ع الحاجز، والرّكض وقت الانفجارات أهين بكتير. فعلًا.. إجت ع الطّبطاب. 

يا عمّي.. دخيلكن إنتو والمازوت، صار الطنّ حوالي ال750 دولار! 

لَيْكْنَا، إجت الشّتويّة وما متنا من البرد! ولو إنّو البرد "قارص"! يا خيّي صحيح كتير صعبة العيشة بالبرد، بس منلبس أواعي زيادة. عنجد كل شي بوقتو حلو !

أكيد بدّكن تحكوني عن الكهربا؟!

يا خال، بلاها، أصلًا ما في أحلى من النّومة بكّير. هيك بتفيق منشّط، وبتصير إنسان منظّم، وبتوصل ع شغلك ع الوقت تمام (بِغ بِن)!

والله من زمان حابب حياتي تترتّب، وصير نام بكّير، وفيق بكّير، تاشوف الصحّة كيف بتصير؟! والله إجت والله جابها. 

مع تحيّات لبناني متفائل بمستقبل بلدو، لحتّى تجي آخرتو هوّي وولدو!

وزغرطي يا إنشراح، وإبكي عللي راح...