من روائع الادب السياسي -الإقتصادي في لبنان ومن موقعي كمتخصّص بأمراض القلب والشرايين والجلطات وكمُهتم بالشأن السياسي، الإقتصادي، المعيشي والإجتماعي العام، أنقل إليكم هذه القصّة التي تُحاكي بدقّة عالية ما وصلت اليه للأسف اوضاعنا في لبنان بسبب سياسات مالية، إقتصادية
 ونقدية فاسدة وفاشلة تعرفون جميعاً من المسؤول عنها من زمرة وعصابات وزنادقة  اهل السُلطة وتغطية ومشاركة المسؤولين الفاسدين في مصرف لبنان وفي جمعية المصارف برئاسة المنسّق الأعلى لشؤونها اللصّ سليم صفير واعضاء الأوركسترا المعروفين. وقد كانوا جميعهم تقريباً شركاء مع ثُلّة معروفة جداً من  المحازبين والمحظيين والمحظوظين من اصحاب النفوذ والسلطة ( الذين لا يتجاوز عددهم ال ٤٠٠ شخص) ركبوا وتسلّطوا على رقاب ٥ مليون لبناني وسرقوا اموالهم واموال المغتربين الذين هاجروا الى غابات وادغال افريقيا او "أمازون" البرازيل، او صقيع امريكا  وكندا لكي يُحصّلوا لقمة العيش التي سرقها زوجات وابناء واصهرة الزعماء ومحاسيبهم دون اي عناء او مشقّة.
واليكم قصة المواطن اللبناني الذي يُحاكي حماره بكل شفافية وصراحة وواقعية. واستميحُكم  لكونها باللغة العاميه لأن فلاح قصّتنا صاحب هذا الحمار الذكي لم يكن محظيّاً مثل ابناء واحفاد الزعماء والإقطاعيين الذين توالوا على السلطة في لبنان ولم يستطع  الحصول على دفشة او واسطة لتخفيف اقساطه ليدخل المدرسه.
لذلك فإن القصّة باللغه العامّية وهي بذلك اقرب لواقعنا اللبناني الذي نعيشه كل يوم.

وتقول القصة انه كان هناك مواطن لبناني مربّي حمار. فاق لقى الحمار ميّت! أخدو لعند الدكتور البيطري تا يعرف شو سبب الوفاة….قال الدكتور لصاحبو : العوض بسلامتك الحمار
مات بجلطة..

تطلع هالمواطن بالحمار.. ومسكلو راسه.. وصار يحكيه بتعجّب وحرقة وإستغراب:

ليه إجتك الجلطة..؟!!!
موظّف وصلت للموت وصار معاشك ما بيوصل للعشرين دولار شهريا ..؟!
قصّرت معك بالشعير..؟!
خريج هندسه او محامي او دكتور او معك إجازة ادارة او تجاره  وما ملاقي شغل..؟!
مُرِض حدا عندك وما استقبلوه بالمستشفى قبل ما تدفع تأمين على الباب قبل ما يسعفوه ويعالجوه وبعدان يحكوا بالمال والعملة الخضرا اللي شاغلة بالهم دون أي اعتبارات اخلاقية  انسانيه متل ما حصل مع كتير مرضى واطفال من لبنان؟!
جمعت كل اللى بتملكه وحطّيتو بالبنك تتعيش منو وفقت الصبح ما لقيت شي من مالك وشقى عمرك.... سرقوه ونهبوه وعم يعطوك ياه بالقطّاره...
وانجلطت لما عرفت انو سليم صفير وتنال صباح وبيت الأزهري وعودة وصحناوي والقصّار وعودة وغيرهم وغيرهم هرّبوا مصرياتهم وعم يتنعّموا فيها برّا لبنان؟!
مديون بالعمله الخضرا وطلع الدولار وما قادر تسكّر ديونك، وكل العالم عم تطالبك ومتل ما أخدتن بدك تردّن ومعاشك بالليره اللبنانيه....  وانت محتار وداير تشحد شمال ويمين وما عم تلاقي مين يساعدك ويوقف جنبك؟؟؟

خبّرني بس ليه إجتك الجلطه..؟!!!
ساكن عند أهلك وما قادر
 تستاجر بيت أو تعمّر لأنهم بعض دعاة الإشتراكية او بعض رجالات الدين واهل الكنايس محتكرين تجارة الترابة وغيرهم من النافذين المحميين محتكر تجارة الحديد والخشب والبحص والرمل والكسّارات وكلّوا على غلا اسعار متل النار..؟!
خبرني في شي حمار سرقك أو نصب عليك..؟؟ ؟؟
ما معك مصاري وعم تشكي القلّة والفقر والمذّلة ع ايدين الطبقة السياسية النتنة،  العفنة ب لبنان..؟!
ما قادر تشتري تياب واكل لأولادك او تدفع اقساط المدارس والجامعات..؟!

قلّي.. ليه إجتك الجلطة..؟!
اجتك فاتورة إشتراك الكهربا وما قدرت تدفعها وفصل عنك "الحرامي القبضاي" الكهربا...
 قاعد عالعتمه وولادك عم يدرسو
عضو الشمعه..؟ ؟؟
غلا اﻻسعار ما عاجبك وحاسس إنو السياسين عم يمصّو دمّك وقتلو حلمك وطموحك متلك متل  ال ٥ ملايين مواطن وملايين المواطنين بالغربة..؟!

خبّرني ليش إجتك الجلطة..؟!
طلعت عالتقاعد ومعاشك ما عاد مكفيك تدفع إيجار بيتك، ومع انهيار الليره صار يكفيك اول اسبوع بالشهر؟!
مرضت بالسرطان وما لقيت دوا وما خليت صيدليه ما سألتها غير وقالت مقطوع....وقالولك موحود بالسوق السودا بأسعار خيالية مش قادر تأمنها لأنها بالدولار وكاش!؟

ممكن أعرف ليه إجتك الجلطه..؟!
الدولار هتك عرض الليرة تبعك..؟!
ورياض سلامة وعصابات المصارف شرشحوك وذلّوك على ابواب المصارف...
وبتروح ل تسحب ميّة دولار من "وديعتك حقّك" وجنى عمرك وتعبك وبتنتطر نهار كامل وبتتبهدل وبترجع ايدك فاضية لأنو خلصوا الدولارت وانت ناطر بالدور وبالشمس وراح نهارك إنتظار رحمة سليم صفير وعصاباتوا ..
بدّك تحوّل مبلغ ل ابنك اللي عم يدرس في الخارج  وصار بنصّ او آخر الطريق ..حرام.. وما عم يقبل مدير الفرع يحوّلك..
خبّرني عم تشوف المسرحيات الدايرة في المجلس النيابي وما قادر تتحمّل لوفكة ولفّ ودوران ليهربوا من التحقيق الجنائي اللي صار لازم يصير بالتوازي حتى ما يصير ولا راح يصير اصلاً لأنّو كلن ما بدهن يصير !؟
عم تسمع هيدا الزعيم كيف عم يطالب بحصّة مذهبو او طائفتو او عشيرتو وكيف مشلول البلد بالمطالب والحصص والكراسي الشخصية وما حدا همّو حصة الوطن!؟

خبّرتي ليش اجتك الجلطة!؟
عندك زعما ونواب وطبقه سياسيه وكتار رجال دين بعد عندن الجرأه انو يدافعوا عن رياض سلامه بنفس الوقت يلي اهم دول العالم من بريطانيا لسويسرا وفرنسا فتحوا تحقيق بسرقه اموال اللبنانيين وإختلاس وتبييض اموال وسرقة مال عام.. ؟
زعلت لأن غسان عويدات وعلي ابراهيم ما تحرّكوا ولا رفً عندهم رمش رغم كل المجازر اللي عملها رياض والعصابة الحاكمة وجمعية المصارف وبيت مكتّف وغيرهم… وهني بدل ما يحكموا بالعدل اللي هوي اساس المُلك منعوا اي تحقيق واي عدالة وبعدهم بيناموا بشكل طبيعي والشعب كلوا مذبوح وممقوت ومنهار ومحتار وعم ينتحر!؟
 أو زعلان من تصرفات يلي سموها "المجنونه" غاده عون وكنت حابب تساعدها لكنهم منعوك وسكّتوك وعملوا عليك حملة إعلامية شرسة ووزوا عليك مارسيل غانم وقرطة المأجورين؟!
قلي ليش انجلطت؟؟!
زعلان لأنو الرئيس الحريري فرضوا عليه ينسحب من الحياه السياسيه وقضوا عتيار المستقبل وعدموه ومنعوا بيت الحريري كلهم يترشحوا عالانتخابات بأمر من البرنس MBS؟!
أو زعلان لأنك كنت متأمّل إنو بقيه الزعما يسقطوا بعد الحريري واحد ورا واحد متل حجاره الشطرنج وما سقط منهم إلّا هذا المعطّر من بعد ما تآمروا عليه الكل وخاصه حلفائه الأقربين في معراب والمختارة؟!
معقول زعلت لأنو الزمرة السياسيه الحاكمة فرّطوا بثروتنا المائية والنفطيه والغازية بالجنوب وباعوا الخط ٢٩ وتنازلوا عن كل ثرواتنا وحقوقنا ومياهنا وأرضنا وعن اكتر من ١٤٠٠ كلم٢ كرمى لعيون جبران وعلي أو مراعاه لمصالح نجيب وغيرو من السياسيين؟!
   رح موت  تأعرف ليه إجتك الجلطة:
يمكن لأنن كلهن تواطؤوا وتنازلوا عن حقوق لبنان بعد ما  حرقوا الأخضر واليابس وسرقوا كل ودائعنا وهلق عم يسرقوا مستقبلنا وحلمنا بأنو نرجع نعيش حياه كريمه بفضل الثروات الموجوده يلي بتتقدر بمليارات الدولارات يلي عم بقدموها مجاناً للعدوّ الصهيوني وللموفد الأميركي الصهيوني يلي كلن عم يرجفوا منو.....
 خبرني ليش انجلطت لأنّك كنت حابب يطلعوا زعماءنا رجال وخاب ظنّك فيهن لأنن سكّت ركابن أمام أول تهديد أميركي....... ؟!   
او معقول زعلت لأنو عرفت انهم كلهم اجتمعوا مع "آموس هوكشتاين" بالسرّ والخفا وحاولوا يعملوا معوا صفقات لرفع العقوبات الإميركية وانت بتعرف انو اميركي صهيوني اكثر من الصهاينة وكنت ملتقي فيه وقت ما خدم بالجيش اليهودي ؟! وعزّت عليك الدني وقلت شو الزمن الغدّار عدونا صار "حكم وفيصل" وهو بيعطي اوامر لكل الزعما والسياسيين وبيحكيهم عن نقل الغاز والكهربا من مصر والاردن اذا سهّلوا الصفقة و تسهيل المفاوضات مع صندوق النقد اذا مضيوا على صك التنازل؟!
اوعى يا حمار ولك اوعى بقى:  ما في ولا سبب للجلطات ب لبنان انتا شكلك عم تزيدها...
مش حاسس انك عم تزيدها؟! ....
روح الله يسامحك.. الله يسامحك..
لبنان بألف خير والأيام الجاية بعد الإنهيار الاعظم اللي موعودين كلنا فيه قبل الإنتخابات او مباشرة بعدها إذا صارت وما رح تصير تأكّد اننا كلنا رح ناكل شعير:
  "نعم تأكّد رح ناكل كلّنا شعير مع هيك زعما وسياسيين وحاكم بأمره وهيك قُضاة ومصرفيين"..

د. طلال حمود- طبيب قلب وشرايين -مُنسّق ملتقى حوار وعطاء بلا حدود